काठमाडौं ।
नेकपा एमालेका अध्यक्ष केपी शर्मा ओलीले केन्द्रमा मात्रै बहुमत ल्याएर काम गर्न नसकिने भएकाले स्थानीय तहमा अधिकतम जित अत्यावश्यक भएको बताएका छन्।
आजबाट सुरु भएको केन्द्रीय कमिटीको बैठकलाई सम्बोधन गर्दै ओलीले भने, ‘सत्ता पक्षबाट जनविरोधी प्रचार भएका छन्। तर, हामी मुख्य शक्ति र मूलधार भएकाले आजको समस्या र चुनौतीलाई समाधान गर्ने उत्तरदायित्व हाम्रो हो। देशलाई समृद्ध नेपाल सुखी नेपालीको स्थानसम्म पुर्याउने अभिभारा हाम्रो हो।’
जनतासँग प्रत्यक्ष जोडिएको भएकाले स्थानीय तहमा जित हासिल गर्नुपर्ने भएकाले चुनावमा लाग्ने नेता कार्यकर्तालाई निर्देशनसमेत दिए।
ओलीले नेताहरूलाई निर्देशन दिँदै भने, ‘आगामी निर्वाचन महत्वपूर्ण छ। केन्द्रमा एमालेको सरकार बनेपछि जनताको घरदैलोसम्म विकास पुर्याउने स्थानीय सरकार नै हो। त्यसलै स्थानीय तहमा जित हासिल गर्न सकेनौँ भने केन्द्रमा बहुमत ल्याएपछि सहज हुँदैन।’
लोकतान्त्रिक प्रणाली कामय रहने जनताले प्राप्त गरेको उपलब्धिको रक्षा गर्दै कार्यान्वयनमा जोड दिनुपर्ने बताए। देशलाई सुशासन र भ्रष्टाचारमुक्त बनाउनु जोड दिए।
‘स्थानीय तह निर्वाचनअघि अर्को बैठक बस्दैन। यो बैठकले स्थानीय तहको निर्वाचन सफल रुपमा सम्पन्न गर्नुपर्ने छ। त्यसका लागि संगठनात्मक र प्रचारात्मक र अरू कसरी जनपरिचालन गर्ने त्यसतर्फ ध्यान दिनुस्’ ओलीको भनाइ छ। कम्युनिष्ट पार्टीहरूको रुपमा एमाले नभएर देशकै ठूलो पार्टी भएको दाबी गरे।
चुनाव लक्षित एप
एमालेले चुनाव लक्षित मोबाइल एप सञ्चालनमा ल्याउन लागेको उनले बताए। ओलीले भने, ‘भोलिको बैठकमा एप्स सार्वजनिक हुन्छ। चुनावी प्रचारलाई प्रविधियुक्त बनाउनका हामीले यो एपलाई ल्याएका हौँ।’
उनले नवौं महाधिवेशनमा करिब ८ लाख ५५ हजार संगठित सदस्य भए पनि निर्वाचनको मुखमा पुग्दा करिब ११ लाख नाघेको दाबी गरे। एमाले प्रवेशको लहर नै चलेको दाबी गर्दै प्रचारलाई व्यवस्थित गर्न एपको प्रयोग ल्याउन लागेको उनको भनाइ छ।
