चितवन ।
सौराहामा बाघको छाला किनबेचमा संलग्न रहेको भनेर फैसला गरिएका एक व्यक्ति १६ वर्षपछि पक्राउ परेका छन्। चितवन राष्ट्रिय निकुञ्जका कर्मचारीले २०६२ सालको असोज १४ गते सौराहा नजिकैबाट १ थान बाघको छाला र ४१ हजार रुपैयाँसहित दुई जनालाई पक्राउ गरेका थिए।
पक्राउ परेका गोरखाको सर्दिबास–३ का सुरेन्द्र गुरूङ, सिम्जुङका वीरबहादुर गुरूङ र अन्य २ जना आखेटोपहार किनबेचमा संलग्न रहेको भनेर निकुञ्जले मुद्दा दायर गरेको थियो।
लामो समयदेखि फरार रहेका २ जनामध्ये तनहुँको देवघाट गाउँपालिकाका विष्णुबहादुर गुरूङलाई भरतपुर–१ लिलाचोकबाट नियन्त्रणमा लिएको निकुञ्जका सूचना अधिकारी गणेशप्रसाद तिवारीले बताए।
उनलाई जिल्ला प्रहरी कार्यालय चितवनको सहयोगमा पक्राउ गरेर जिल्ला कारागार भरतपुरमा बुझाइएको तिवारीले बताए।
सूचना अधिकारी तिवारीकाअनुसार बाघको छालाको किनबेचमा संलग्न भएको फैसला भएर पनि फरार रहँदै आएका गुरूङलाई १५ वर्ष कैद र १ लाख रुपैयाँ जरिवाना हुनेछ।
