काठमाडौं ।
पूर्व पश्चिम राजमार्गअन्तर्गत सर्लाहीको फूलजोर खोला पुलबाट बस खस्दा ४ जनाको मृत्यु भएको छ। वीरगन्जबाट जनकपुरतर्फ जाँदै गरेको ना ४ ख ८५५५ नम्बरको यात्रुबाहक बस आइतबार बिहान करिब ११ : १५ बजेतिर पुलबाट तल खसेको जिल्ला प्रहरी कार्यलय सर्लाहीले जानकारी दिएको छ।
दुर्घटनामा परी ३० जना घाइते भएका जिल्ला प्रहरी कार्यालय सर्लाहीका डिएसपी माधवप्रसाद बुढाथोकीले जानकारी दिए। उनका अनुसार घाइतेहरुको लालबन्दी र रानीगंजका स्थानीय अस्पतालहरुमा उपचार भइरहेको छ।
मृतकहरुको पहिचान खुलिनसकेको डिएसपी बुढाथोकीले बताए। बसको अगाडिपट्टिको टायर पड्किएर अनियन्त्रित हुँदा पुलबाट खसेको प्रारम्भिक अनुसन्धानमा देखिएको प्रहरीले जनाएको छ।
