नेपालगन्ज ।
बाँकेका सहरी क्षेत्रमा गाडी दुर्घटनामा वृद्धि भएको छ । ट्राफिक नियम पालना नहुँदा दैनिक दुर्घटना भइरहेका छन् । तैपनि नियमन अझै फितलो छ । उल्लंघन गर्नेबाट जरिवाना लिँदा पनि सडक दुर्घटना न्यूनीकरण हुन सकेको छैन ।
सामान्य जरिवानापछि कारबाहीबाट उन्मुक्ति पाउने हुँदा पनि सवारी चालकले तीव्र गतिमा सवारी साधन चलाउँछन् । जसले गर्दा सडक दुर्घटनालाई बढावा दिएको छ । बाँकेमा पछिल्लो साढे नौ महिनाको अवधिमा ५४ जनाले सवारी दुर्घटनामा ज्यान गुमाइसकेका छन् ।
जिल्ला ट्राफिक कार्यालयको तथ्यांकअनुसार सडक दुर्घटनामा यो अवधिमा पाँच जना बालबालिकाले समेत ज्यान गुमाएका छन् । चालु आर्थिक वर्षको साउनदेखि चैत १५ सम्म सडक दुर्घटनामा बालिका एक, बालक चार, महिला १० र पुरुष ३९ गरी ५४ जनाले ज्यान गुमाएका छन् । १ सय १६ वटा ठूला सवारी दुर्घटनामा परेर ५४ जनाको मृत्यु भएको जिल्ला ट्राफिक कार्यालय बाँके कोहलपुरका प्रमुख ट्राफिक प्रहरी निरीक्षक हिमालय शाहले बताए ।
बाँके ट्राफिकको तथ्यांकअनुसार साउनमा चार, भदौमा पाँच, असोजमा १२, कात्तिकमा तीन, मंसिरमा नौ, पुसमा आठ, माघमा पाँच, फागुन पाँच र चैत १५ सम्म तीन जनाले ज्यान गुमाइसकेका छन् । गत आर्थिक वर्ष २०७७र७८ मा बाँकेमा भएका १ सय ४३ सवारी दुर्घटनामा परेर ७७ जनाको ज्यान गएको थियो ।
त्यसभन्दा अघिल्लो आर्थिक वर्ष २०७६र७७ मा भएका २ सय ८० वटा सडक दुर्घटनामा ७३ जनाले ज्यान गुमाएका थिए । यी दुवै आर्थिक वर्षमा कोरोनाका कारण सवारी साधन कम चलेका थिए । तर, सवारी दुर्घटनाको दर र ज्यान गुमाउनेको संख्या हेर्दा बर्सेनि बढिरहेको देखिन्छ ।
