कपिलवस्तु ।
कपिलवस्तुको विजयनगर गाउँपालिकामा नदीजन्य पदार्थ दैनिक चाेरी निकासी भइरहेको पाइएकाे छ । विजयनगर जनता समाजवादी पार्टीका अध्यक्ष सन्तराम तेलीकाे ट्रेक्टरले राति ११ बजेकाे समयमा चिरई नदीबाट दैनिक चाेरी गरिरहेकाे अवस्था २ वटा ट्रेक्टर भेटिएको स्थानीय जाकिर हुसेनले जानकारी दिए । चिरई नदीकाे करबला, भैँसहवा र बलुइया घाटबाट चाेरी निकासी भइरहेको उनले बताए । सन्तराम तेलीकाे लु ३ त ४७९७, लु २ त ९६२५, बब्बु थारुकाे लु २ त ६६२४ र इन्तजार थारुकाे लु २ त २४६९ नम्बरको ट्रेक्टरले नदीजन्य पदार्थ चाेरी गरिरहेकाे स्थानीय हुसेनकाे भनाइ छ ।
रातिकाे माैका छाेपी नदीबाट करिब ५ सय मिटर दुरीमा जंगलमै डम्पिङ पनि गरेकाे उनले जनाए । स्थानीयले प्रहरीकाे मिलेमतो चाेरी भइरहेकाे गुनासाेसमेत गरेका छन् । प्रहरीलाई खबर गरे पनि ध्यान नदिएकाे उनीहरूले बताएका छन् ।
यता इलाका प्रहरी कार्यालय गणेशपुरका प्रहरी निरीक्षक रण बहादुर विष्टले प्रहरीकाे कुनै संलग्नता नरहेकाे दाबी गरे । उनले शनिबार लु २ त ९६२५ नम्बरको गाडी नियन्त्रणमा लिए तापनि ट्रेक्टरमा केही पनि लाेड नभएकोले गाडी छाेडेकाे बताए । उनले स्थानीयले नै रातिकाे माैका छाेपी नदीजन्य पदार्थ चाेरी गरेकाे हुन सक्ने बताए । प्रहरी निरीक्षक विष्टले दिनरात निगरानीलाई बढाएकाे बताउँदै चाेरीमा संलग्न भएका गाडीलाई नियन्त्रणमा लिई कारवाहीसमेत गरिँदै आएकाे जनाए ।
