अर्घाखाँची । अर्घाखाँची जिल्ला कोरोना मुक्त भएको छ । जिल्लामा सक्रिय कोरोना संक्रमित शुन्य रहेको छ ।
कोभिड १९ को महामारीका कारण २ वर्षसम्म ठप्प जिल्ला पूर्ण रुपमा कोरोना मुक्त भएपछि जिल्ला फेरि पुरानो लयमा फर्किएको छ । यस्तै स्थानियबासीमा खुशीयाली छाएको छ ।
जिल्लाभरका उद्योग व्यापार फेरि बिस्तारै पुरानो अवस्थामा फर्किन थालेका छन्। जिल्लामा गएको २ वर्ष यता बन्दाबन्दी वा निषेधाज्ञाका कारण व्यापार व्यवसाय लगायत सम्पूर्ण क्षेत्र प्रभावित भएका थिए ।
यस्तै जिल्लामा गत फागुन २३ सोमवारदेखि सबै प्रतिबन्धात्मक व्यवस्था हटाइएको छ। साथै राजनीतिक, आर्थिक, सामाजिक, शैक्षिक तथा व्यावसायिक क्रियाकलाप सञ्चालनमा आएका छन् ।
अर्घाखाँची जिल्लामा होटल लगायत रात्रिकालीन मनोरञ्जनात्मक व्यवसाय चौबीसै घण्टा सञ्चालन गर्न सकिने भएको छ ।
सदरमुकाम सन्धिखर्क लगायत जिल्लाभर डान्स रेस्टुरेन्ट एन्ड बार, क्लबजस्ता व्यवसाय, होटल लगायत रात्रिकालीन मनोरञ्जनात्मक व्यवसाय चौबीसै घण्टा सञ्चालन गर्न सकिने भएको हो ।
जिल्लामा कोरोना संक्रमितको संख्या ४९६४ जना पुगेको थियो । जसमा सन्धिखर्क नगरपालिकामा २१८८ जना, भूमिकास्थान नगरपालिकामा ८०० जना, शितगंगा नगरपालिकामा ५५३ जना, मालारानी गाउँपालिकामा ५८४ जना, पाणिनी गाउँपालिकामा ५२७ जना र छत्रदेव गाउँपालिकामा ३१२ जना संक्रमित रहेका थिए ।
साथै जिल्लामा ४८७० जनाले कोरोना जितेका थिए । जसमा सन्धिखर्क नगरपालिकामा २१५८ जना, भूमिकास्थान नगरपालिकामा ७८४ जना, शितगंगा नगरपालिकामा ५३८ जना, मालारानी गाउँपालिकामा ५६७ जना, पाणिनी गाउँपालिकामा ५१५ जना र छत्रदेव गाउँपालिकामा ३०८ जनाले कोरोनालाई जितेका थिए ।
यस्तै जिल्ला प्रशासन कार्यालयका अनुसार काेराेना संक्रमणका कारण जिल्लामा ९४ जनाको ज्यान गएको थियो । जसमा सन्धिखर्क नगरपालिकामा ३० जना, भूमिकास्थान नगरपालिकामा १६, शितगंगा नगरपालिकामा १ जना आत्महत्या सहित १५, मालारानी गाउँपालिकामा १७, पाणिनी गाउँपालिकामा १२ र छत्रदेव गाउँपालिकामा ४ जना रहेका थिए ।
