राेल्पा।रोल्पाको माडी गाउँपालिका–५ का जनप्रतिनिधिमाथि सरकारी बजेट हिनामिना गरेको आरोप लागेको छ । वडाध्यक्षसहित त्यहाँका सबै जनप्रतिनिधि अन्तरपालिका कार्यकालको अन्तिम क्षणमा अवलोकन भ्रमणमा निस्केपछि विपक्षीहरुले सरकारी रकम दुरुपयोगको आरोप लगाएका हुन् ।
वडाध्यक्ष भरतबहादुर बुढाको नेतृत्वमा पाँच जनाको टोली फागुन २५ गते एक हप्ते भ्रमणका लागि रोल्पाबाट निस्किएको थियो । वडाध्यक्ष बुढा, कार्यपालिका सदस्य सविता घर्तिमगर, वडासदस्य रत्नबहादुर डाँगी, गौरी परियार र वीरबहादुर घर्तिको टिम रातो स्कर्पियो भाडामा लिएर रोल्पा, रुकुम, कास्की, बाग्लुङ, बेनी हुँदै अस्ति काठमाडौं आइपुगेका थिए । उक्त भ्रमणलाई आलोचकहरुले सेवाग्राहीलाई मर्का पर्ने गरि वडा कार्यालयमा ताल्चा लगाएर जनप्रतिनिधिहरु सरकारी रकममा घुम्न हिँडेको भनेका छन् ।
तर, वडाध्यक्ष बुढाले भने सरकारी खर्चमा भ्रमण गरेको आरोपमा कुनै सत्यता नभएको बताए । भ्रमण गरेको स्वीकार गर्दै उनले काम विशेषले काठमाडौं आउनु परेको र ‘रिफ्रेसमेन्टका लागि आफ्नै खर्चमा केही ठाउँ घुमेको,’ स्वीकार गरे । ‘कार्यकालको अन्त्यतिर छौँ । यत्रो समय काम गरियो, रिफ्रेस हौँ न त भनेर काठमाडौं आउँदा बाटो परेकाले एक हप्ताको समय लिएर पूर्वनिर्धारित कार्यक्रमअनुसार केही ठाउँ घुम्दै आएका हौँ’, अस्ति काठमाडौं आइपुगेका उनले भने, ‘सरकारी रकम खर्च गरेर घुमेको होइन । यो राजनीतिक पूर्वाग्रहका आधारमा छरिएको भ्रम मात्रै हो ।
उनले संघीय सरकारका मन्त्रीहरुसँग भेटघाट गरेर केही योजनाका विषयमा छलफल गर्न काठमाडौं आउँदा घुम्दै आएको प्रष्ट्याए । रोल्पाको परिवर्तन, थवाङ्ग, रुकुमको भूमे गाउँपालिका घुमेर बेनी, पोखरा, मुक्तिनाथ हुँदै काठमाडौं आएको र सोमबार जिल्ला फर्कने कार्यतालिका रहेको वडाध्यक्ष बुढाले आइतबार सुनाए ।
तर, आरोप लगाउनेहरुले भने वडाबाट एक लाख रुपैयाँ बजेट विनियोजन गरेर उनीहरु भ्रमणमा निस्किएको बताएका छन् । चुनाव घोषणा भइसकेको र कार्यकाल समाप्तितिर आइपुग्दा विनियोजित बजेट सक्न अनुत्पादक घुमघाममा खर्च गरिएको उनीहरुको दाबी छ । भ्रमण टोलीकै एक सदस्यले मुक्तिनाथमा नुहाउँदै गरेको फोटो फेसबुकमा राखेपछि प्रतिस्पर्धीले मसला पाएको वडाध्यक्षको भनाइ छ ।
वडा कार्यालय नै खालि हुनेगरी भएभरका सबै जनप्रतिनिधि घुम्न निस्किएपछि सेवाग्राही भने मर्कामा परेका छन् । सार्वजनिक सूचनासमेत नगरी वडा कार्यालयमा ताल्चा लगाएर जनप्रतिनिधिहरु घुम्न निस्किएपछि वडामा वडाध्यक्षले भने कार्यपालिका सदस्य धनबहादुर कामीलाई कार्यवाहक सुम्पेर हिँडेकाले विपक्षीले भनेजस्तो सेवाग्राहीको काम नरोकिएको दाबी गरे ।
